स्कूल बसले किच्दा ४ वर्षकी सुस्मिताको मृत्यु

नवलपुर । देवचुलीको नेपाल मा.वि केउरेनीमा विद्यालय बसको ठक्करबाट ४ वर्षीय बालिकाको मृत्यु भएको छ । स्कुल बसबाट झर्दा खसेको झोला टिप्न लागेकी ४ वर्षकी बालिकाको सोमबार बिहान साढे ९ बजे गाडी ब्याक गर्दा दुर्घटना भएको हो ।

लु १ क ३८१४ नं. को स्कूल बसले किचेर बाराको कलैया स्थायी ठेगाना भई हाल देवचुली वडा नं. १४ सातघरेमा बस्दै नेपाल मा.विमा नर्सरीमा पढ्ने ४ वर्षीया बालिका सुस्मा पासवानको मृत्यु भएको जिल्ला प्रहरी कार्यालय नवलपुरले जनाएको छ । 

बालिकाको शव अहिले देवचुली नगर अस्पतालमा राखिएको छ । विद्यालय हाताभित्र भएको अकल्पनीय दुर्घटनामा ज्यान गुमाएकी बालिकाका अभिभावक सहितको परिवार पक्ष, प्रहरी-प्रशासन, जनप्रतिनिधि, विद्यालय प्रशासन एवं व्यवस्थापन पक्षबीचको सहजीकरण छलफलका प्रयास भएका छन् । दुखत दुर्घटनाले परेको क्षति र पीडालाई केन्द्रमा राखेर सहजीकरणको प्रयास र अनुसन्धानका प्रक्रिया सँगसँगै अगाडि बढाईएको इलाका प्रहरी कार्यालय रजहरका प्रमुख एवं प्रहरी निरीक्षक लाल बहादुर शाहीले जानकारी दिनुभएको छ ।

विद्यालयमा भएको अकल्पनीय घटनामा ज्यान गुमाएकी सुस्मिता पासवानप्रति विद्यालयले दुख प्रकट गर्दै सोमबार विद्यालय बन्द गरिएको छ ।