कौरा नृत्यमा गैँडाकोटका कुन कुन विद्यालयले पुरस्कार जिते ? 

नवलपरासी (पूर्व) । शिक्षा, युवा तथा खेलकुद शाखा गैँडाकोटको आयोजनामा सञ्चालित कौरा नृत्य प्रतियोगितामा कृष्णगण्डकी माध्यामिक विद्यालय गैँडाकोट ३ ढोडेनीले प्रथम स्थान जित्न सफल भएको छ । त्यसैगरी कन्टिनेन्टल आमाविले दोस्रो स्थान र गैंडाकोट इङ्लिस बोर्डिङ स्कुलले तेस्रो स्थान सुनिश्चित गरेको छ । कार्यक्रममा सान्त्वना पुरस्कार जनक नमुना माविलाई प्रदान गरिएको छ । 

कक्षा ६–१२ अध्ययनरत छात्रछात्राहरूको प्रतिभा प्रस्फुटन र लोक संस्कृतिको संरक्षणका लागि कार्यक्रम आयोजना गरिएको जानकारी शिक्षा शाखा प्रमुख वालकृष्ण चापागाईँले दिनुभयो । जनक नमुना माविका अध्यक्ष केशवप्रसाद सापकोटाको अध्यक्षतामा सम्पन्न सो कार्यक्रममा प्रधानाध्यापक चूडामणि शर्मा कँडेलले मन्तव्य राख्नुभएको थियो ।

कार्यक्रमको सहजीकरण शिक्षक हिमालदेव पंगेनीले गर्नुभएको थियो । कार्यक्रमका निर्णायकहरूमा भुवन आलेमगर, निशा थापामगर, चन्द्रबहादुर आले र धनबहादुर राना रहनुभएको थियोे ।