मौलाकालिका विद्यापीठमा गुरुकुल स्तरीय हाजिरी जवाफ प्रतियोगिता 

गैँडाकोट । मौलाकालिका विद्यापीठ गुरुकुलम्को आयोजनामा गुरुकुल स्तरीय हाजिरी जवाफ प्रतियोगिता मौलाकालिका मन्दिरको सभाहल गैँडाकोटमा सम्पन्न भएको छ । गैँडाकोट नगरपालिका भित्रका ४ वटा गुरुकुलबाट ९ वटा समूहले प्रतियोगितामा सहभागिता जनाएका थिए । 

कार्यक्रमका प्रमुख अतिथि गैँडाकोट नगरपालिका वडा नं १ का वडा अध्यक्ष सुरेन्द्रप्रसाद रेग्मीले गुरुकुलको भौतिक संरचना निर्माण र गुरुकुलमा अध्ययनरत विद्यार्थीहरुको क्षमता विकासमा वडाले विशेष योजना र बजेटको व्यवस्था गर्ने बताउनुभयो ।

प्रतियोगितामा श्री मौलाकालिका संस्कृत विद्यापीठ गुरुकुलमबाट सहभागी किरण पौडेल, वर्षात् पराजुली र रामचन्द्र पौडेलले प्रथम स्थान, श्रीमद् रामानुज वेदविद्याश्रमबाट सहभागी गणेश पोख्रेल, आयुष तिवारी, र कृष्ण घिमिरेले द्वितिय स्थान , श्री योगी नरहरिनाथ अध्यात्म विज्ञान गीता पाठशालाबाट सहभागी सुजननाथ , अजितनाथ र लक्ष्मणनाथले तृतिय स्थान प्राप्त गरेका छन् ।

सो कार्यक्रममा धार्मिक सेवा समिति मौलाकालिका मन्दिरका अध्यक्ष शालिकराम सापकोटा र सचिव श्यामसुन्दर पराजुलीले शुभकामना मन्तव्य राख्नुभएको थियो ।

मौलाकालिका संस्कृत विद्यापीठ गुरुकुलम् व्यवस्थापन समितिका अध्यक्ष हरिप्रसाद सापकोटाको अध्यक्षमा सम्पन्न सो कार्यक्रममा निमित्त प्रधानाध्यापक टंकनाथ रिजालले सञ्चालन गर्नुभएको थियो ।