सन् २०२४ मा ३० हजारभन्दा बढी विदेशी पर्यटक अन्नपूर्ण पदमार्ग पुगे 

पोखरा । अन्नपूर्ण पदमार्गमा गत सन् २०२४ मा ३० हजार आठ सय ६६ विदेशी पर्यटक पुगेका छन् । विश्वकै १० औँ स्थानमा पर्ने पदमार्गमा एक वर्षमा १८ हजार चार सय ९९ पुरुष, १२ हजार तीन सय ६२ महिला र पाँच अन्य व्यक्ति पुगेका हुन् ।

अन्नपूर्ण संरक्षण क्षेत्र आयोजना (एक्याप) का अनुसार सार्क राष्ट्रका एक हजार पाँच सय ६७ पुरुष र दुई सय ८७ महिला त्यहाँ पुगेका छन् ।

पदमार्ग जानेमा फ्रान्स, इजरायल, जर्मनी, बेलायतलगायत देशका नागरिकको सङ्ख्या बढी रहेको छ । सन् २०२३ मा २१ हजार दुई सय ४७ विदेशी पर्यटक त्यहाँ पुगेका थिए ।