राष्ट्रिय महिला लिग आजदेखि सुरु हुँदै 

काठमाण्डौँ । एन्फा राष्ट्रिय महिला लिग फुटबलको दोस्रो चरणका खेलहरू आजदेखि सुरु हुँदै छन् । पहिलो चरणमा शीर्ष पाँच स्थानमा रहेका टोलीबीच दोस्रो चरणमा प्रतिस्पर्धा हुने अखिल नेपाल फुटबल सङ्घ (एन्फा)ले जनाएको छ । दोस्रो चरणमा एपीएफ, त्रिभुवन आर्मी, नेपाल पुलिस, स्याङ्जाको वालिङ नगरपालिका र बागमती प्रदेशले प्रतिस्पर्धा गर्नेछन् । अन्तिम चरणमा २४ खेल हुनेछन् ।

पहिलो खेलमा त्रिभुवन आर्मी क्लबले बागमती युथ क्लबको सामना गर्नेछ । कोशी प्रदेशले शीर्ष पाँच स्थानमा रहँदै दोस्रो चरण स्थान पक्का गरेको थियो । तर, कोशीले आर्थिक कारण देखाउँदै दोस्रो चरणमा सहभागिता नहुने निर्णय गरेपछि पहिलो चरणमा छैटौँ स्थानमा रहेको बागमतीले मौका पाएको हो ।