नव निर्वाचित नगर बाल सञ्जालका बालबालिकाहरुलाई अभिमुखीकरण कार्यक्रम सम्पन्न

गैँडाकोट नगरपालिकाको आयोजनामा नगर बाल सञ्जालका नव निर्वाचित पदाधिकारीहरुका लागि आज बुधबार अभिमुखीकरण कार्यक्रम सम्पन्न गरिएको छ । अभिमुखीकरण कार्यक्रममा बालमैत्री अभियन्ता जगन्नाथ उपाध्यायले बाल क्लब र बाल सञ्जालको गठनको उद्देश्य, कार्य क्षेत्र, बाल सञ्जालको योजना निर्माण, प्रस्ताव लेखन, बाल सञ्जालको बैठक सञ्चालन प्रक्रिया, बाल सञ्जालका पदाधिकारीको काम, कर्तव्य र अधिकारका बारेमा सहजीकरण गर्नुभएको थियो । सो कार्यक्रममा बाल सञ्जालका पदाधिकारीहरुले आर्थिक वर्ष २०८१ / ०८२ का लागि कार्यक्रमको खाका सहितको कार्य योजना समेत निर्माण गरेका छन् । कार्यक्रममा बालबालिका एवं शिक्षा अधिकृत रामप्रसाद अधिकारी, महिला बालबालिका शाखा प्रमुख सिताकुमारी लामिछाने पौडेल, महिला शाखा कर्मचारी नरमाया राना लगायतको उपस्थिति रहेको थियो । कार्यक्रममा नगरबाल सञ्जालका पदाधिकारी र सदस्य गरी १९ जनाको सहभागिता रहेको
थियो । नगर बाल सञ्जाल सह सचिव मिना रानाभाटले सञ्चालन गर्नुभएको सो कार्यक्रम नगर बाल सञ्जाल अध्यक्ष संसार सापकोटाको अध्यक्षतामा सम्पन्न भएको थियो ।