गृहमन्त्री लेखकद्वारा गैँडाकोटमा वेष्टर्न एडभान्स कलेजको शैक्षिक भवनको शिलन्यास

नवलपरासी (बर्दघाट सुस्तापूर्व) । नेपाल सरकारका गृहमन्त्री रमेश लेखकले गणतन्त्र स्थापना पश्चात् नेपालमा परिवर्तनहरु भएको बताउँदै नेपालमा केही भएन भन्ने भाष्य स्थापना हुनु गलत भइरहेकोे बताउनुभएको छ ।

गैँडाकोट वडा नं. १ मा वेष्टर्न एडभान्स कलेजको इएमआइटी शैक्षिक भवनको शिलन्यास कार्यक्रममा गृहमन्त्री लेखकले भन्नुभयो “मुलकुमा आर्थिक समस्या छ, विकास निर्माणका क्षेत्रमा समस्या छन्, शिक्षा लगायतका क्षेत्रमा विभिन्न समस्या छन्, नेपालमा समस्या बाहेक केही छैन भन्ने भाष्य निर्माण भइरहेको छ । यो पनि सत्य नभएको आग्रह गर्न चाहन्छु ।” नेपालमा प्रयाप्त सम्भावना भएको बताउँदै रमेश लेखकले भन्नुभयो “सुदुरपश्चिम विश्वविद्यालयबाट सम्बन्धन प्राप्त कलेज गैँडाकोटमा आइपुगेको छ, इन्जिनियरिङ, म्यानेजमेण्ट, सूचनाप्रविधिको एउटा ठूलो भविष्य बोेकेको कलेज गैँडाकोटमा सुरुवात हुनु यस गण्डकी प्रदेश र मुलुककै लागि गौरवको विषय रहेको बताउनुभयो । 

नवलपरासी वर्दघाट सुस्तापूर्व गैँडाकोट १ मा वेष्टर्न एडभान्स कलेज अफ इन्जिनियरिङ्ग एण्ड म्यानेजमेण्टले निर्माण गर्न लागेको इएमआइटी शैक्षिक भवनको गृहमन्त्री रमेश लेखकले शनिबार शिलन्यास गर्नुभएको छ । 

कलेजका प्रमुख,  इन्जिनियर राजन सापकोटाले गैँडाकोटलाई इन्जिनियरिङ्ग र म्यानेजमेण्टको शैक्षिक हवको रुपमा विकास गरिने बताउनुभयो । देशकै मध्यभागमा अवस्थित यस कलेजले सर्बसुलभ शिक्षाको पहुँच अभिवृद्धि गर्न सधैँ प्रतिवद्ध रहेको बताउनुभयो । 
कार्यक्रममा गण्डकी प्रदेश सभा सदस्य महेन्द्रध्वज जिशि, संविधान सभा सदस्य कृष्ण पौडेल, सुदुरपश्चिम विश्वविद्यालयका उपकुलपति प्रा.डा. हेमराज पन्त, सुदुरपश्चिम विश्वविद्यालयका रजिष्ट्रार यज्ञराज पाठक, उद्योग बाणिज्य संघ गण्डकी प्रदेशका अध्यक्ष अमृत भट्टचन, युवा सामाजिक व्यक्ति गोकुल सापकोटा लगायतले कलेजको सफलताको शुभकामना दिएका छन् ।