कालिका नमुना माध्यमिक विद्यालयले स्वर्ण महोत्सव मनाउँदै

गैँडाकाेट  /   गैँडाकोट ८ मा अवस्थित कालिका नमुना माध्यमिक विद्यालयले स्वर्ण महोत्सवको पूर्व सन्ध्यामा भूतपूर्व प्रधानाध्यापक, शिक्षक तथा कर्मचारीको भेला शनिबार सम्पन्न गरेको छ । 
विद्यालय व्यवस्थापन समितिका अध्यक्ष गंगाधर सापकोटाले विद्यालयको स्वर्ण महोत्सव कार्यक्रमलाई सफल पार्न आ आफ्‌नो क्षेत्रबाट सहायोग गर्न पूर्व प्रधानाध्यापक, शिक्षक, कर्मचारी, विद्यार्थीहरु, सहयोगी व्यक्तित्व, समाजसेवी लगायत सम्पूर्णमा अनुरोध गर्नुभयो ।
सो भेलामा प्रधानाध्यापक होमनाथ शर्माले विद्यालयको स्वर्ण महोत्सव कार्यक्रमको खाका प्रस्तुत गर्नुभएको थियो । स्वर्ण महोत्सव कार्यक्रमलाई भव्य रुपमा सफल बनाउनका  लागि विद्यालयमा रहेर सेवा प्रदान गर्नुहुने पूर्व प्रधानाध्यापक, शिक्षक कर्मचारीहरुबाट राय, सुझाब संकलन गरी सो अनुसार स्वर्ण महोत्सवका कार्यक्रम तय गरिने प्रधानाध्यापक शर्माले बताउनुभयो । 
सो भेलामा पूर्व शिक्षक तथा हाल जनक नमुना माध्यमिक विद्यालयका प्रधानाध्यापक चूडामणि शर्मा कंडेल , संस्थापक प्रधानाध्यापक वेदप्रसाद गौँडेल, पूर्व प्रधानाध्यापक लोकनाथ कंडेल र प्रजानाथ कंडेल, पूर्व शिक्षकहरु भानु लामिछाने, कृष्णप्रसाद काफ्‌ले, हरि सुवेदी, चिन्तामणि खनाल, छायादत्त सापकोटा,पूर्णकला सुवेदी लगायतले शुभकामना मन्तव्य राख्नुभएको थियो । 
कार्यक्रम विद्यालय व्यवस्थापन समिति अध्यक्ष गंगाधर सापकोटाको अध्यक्षतामा सम्पन्न भएको थियो ।
विद्यालयले स्वर्ण महोत्सवको कार्यक्रम अर्न्तगत गत जेठ २४ गते पूर्व अध्यक्षहरुको भेला सम्पन्न गरिसकेको छ भने साउन १७ गते शनिबार पूर्व विद्यार्थीहरुको पुर्नमिलन तथा भेला आयोजना गरेको छ । सो पूर्व विद्यार्थीहरुको  भेलाबाट पूर्व विद्यार्थीहरुको तदर्थ समिति गठन गर्ने कार्यक्रम रहेको प्रधानाध्यापक शर्माले जानकारी दिनुभयो ।