प्राकृतिक चिकित्सालयको माओवादी केन्द्रका अध्यक्ष प्रचण्डकोे अनुगमन

नवलपुर । हुलाकी लोकमार्ग केन्द्रित ‘जनतासँग माओवादी तराई मधेस जागरण अभियान’ अन्तर्गत माओवादी केन्द्रकाअध्यक्ष पुष्पकमल दाहाल ‘प्रचण्ड’ले देवचुली नगरपालिका-१६, रजहरस्थित सामुदायिक प्राकृतिक चिकित्सालयको अनुगमन गर्नुभएको छ । 

चिकित्सालय भ्रमणपछि नयाँ वर्ष २०८२ को अवसरमा शुभकामना आदानप्रदान तथा अन्तकिया कार्यक्रम समेत भएको छ । कार्यक्रममा बोल्दै अध्यक्ष प्रचण्डले प्राकृतिक चिकित्सा प्रणालीको महत्त्वबारे चर्चा गर्नुभयो ।

 उहाँले स्थानीय स्तरमा स्वास्थ्य पूर्वाधारको विकासका लागि समुदायको सक्रिय सहभागिता अपरिहार्य रहेकोमा जोड दिँदै प्रचण्डले महिला आवाससहितको नयाँ उपचार कक्षको उद्घाटन समेत गर्नुभएको छ 

त्यस क्रममा उहाँले आफू प्रधानमन्त्री रहेका बेला संघीय सरकारबाट १३ करोड रुपैयाँ बजेट विनियोजन गरिएको जानकारी दिँदै प्रदेश सरकारलाई पनि थप लगानी गर्न आग्रह गरेको जानकारी दिनुभयो । 

‘स्थानीय रूपमा सुरु गरिएको यस चिकित्सालयले आज देशकै महत्त्वपूर्ण स्वास्थ्य संस्थाको रूपमा परिचय बनाइसकेको छ’ उहाँले भन्नुभयो, ‘नेपालको योगा तथा प्राकृतिक चिकित्सा प्रणालीले पश्चिमी चिकित्सा प्रणाली र एलोपेथिक प्रवृत्तिमा देखिएको बेथिति हटाउँदै, सस्तो र सुलभ स्वास्थ्य सेवा प्रदान गरिरहेको छ ।’

प्रचण्डले आफू सरकारमा रहँदा पनि यस संस्थाको विकासमा निरन्तर सहयोग पुर्‍याएको उल्लेख गर्दै आगामी दिनमा यसलाई प्राकृतिक चिकित्सा शिक्षण अस्पताल तथा विश्वविद्यालयको रूपमा विकास गर्न आफ्नो पार्टीले पूर्ण सहयोग गर्ने प्रतिबद्धता व्यक्त गर्नुभयो ।