गैंडाकोटमा लम्पी स्किन रोगको प्रकोप, ११ वटा गाईभैँसीको मृत्यु

गैंडाकोट । पशु चौपायामा लाग्ने लम्पी स्किन रोगका कारण गैंडाकोट नगरपालिकामा (१ देखि १८ सम्म) हालसम्म ११ वटा गाईभैँसी मरेका छन् । जसमध्ये साविकको हर्कपुरमा ९ वटा र साविकको गैंडाकोटमा २ वटा पशुको मृत्यु भएको गैंडाकोट नगरपालिकाका पशु शाखा प्रमुख डा.प्रमोद कुमार पौडेलले जानकारी दिनुभएको छ । 

प्रमुख पौडेलका अनुसार हालसम्म गैंडाकोटका २ सय ६० वटा गाईभैँसीमा यस रोगको सङ्क्रमण देखिएको छ । जसमध्ये ११ भैँसी र २ सय ४९ गाईमा सङ्क्रमण देखिएको बताइएको छ । साविकको हर्कपुर क्षेत्रमा गाई बढी प्रभावित भएको पौडेलले जानकारी दिनुभयो ।

लम्पी स्किन देखिएसँगै खोप लगाउने गाईभैँसीको संख्या बढेको छ । हालसम्म गैंडाकोटमा ४ हजार ५ सयभन्दा बढी गाईभैँसीलाई खोप दिइसकेको छ ।

गर्मीयाममा लामखुट्टे, झिँगा आदिबाट यो रोग तीव्र फैलिने गर्दछ । यो रोग लागेपछि गाईभैँसीमा उच्च ज्वरो आउने, दानापानी कम खाने, दूध उत्पादन घट्ने, छालामा गिर्खा देखिने, ओठ र मुखभित्र घाउ देखिने, आँखामुखबाट तरल पदार्थ आउने, ¥याल काढ्ने, जस्ता लक्षण देखिने गर्छन् ।

सङ्क्रमित पशुको ओसारपसार, सामुदायिक चरन क्षेत्र, दाना-पानी खाने स्थान वा गर्भाधानमार्फत पनि रोग सर्ने गर्दछ । यसको रोकथामका लागि खोप लगाउने, विश्वसनीय स्रोतबाट पशु खरिद गर्ने, गोठलाई सरसफाइसहित झिँगा-लामखुट्टे मुक्त राख्ने र आवश्यक परे कीट विकर्षक प्रयोग गर्नुपर्ने पशु शाखा प्रमुख पौडेलको सुझाव रहेको छ ।

अहिले गैंडाकोटमा एक हजारभन्दा बढी किसानले फर्म दर्ता गरेर पशुपालन व्यवसाय सञ्चालन गर्दै आएका छन् ।