नेपाल शिक्षक महासंघद्वारा गैँडाकोटमा धर्ना तथा ध्यानाकर्षण

नवलपुर, १३ भाद्र ।  नेपाल शिक्षक महासंघ राष्ट्रिय समितिद्वारा आयोजित गाउँ नगरपालिका धर्ना कार्यक्रम अन्तरगत गैँडाकोट नगरपालिकाका शिक्षकहरुले नगरपालिकाको कार्यालयमा धर्ना एवं ध्यानाकर्षण पत्र बुझाएका छन् । 

नेपाल शिक्षक महासंघ नवलपरासी(ब.सू.पूर्व)का उपाध्यक्ष हिमालदेव पंगेनीले ध्यानाकर्षण पत्र वाचन गरी गैँडाकोट नगरपालिकाका प्रमुख प्रशासकीय अधिकृत झविन्द्र खनाललाई ध्यानाकर्षण पत्र बुझाउनुभएको थियो। ध्यानाकर्षण पत्र बुझ्दै प्रमुख प्रशासकीय अधिकृत झविन्द्र खनालले शिक्षकहरुका मागहरुलाई सम्बन्धि निकाय सम्म पुर्याउने कुरा व्यक्त गर्नुभयो । 

वि.सं २०७५ साल, २०७८ साल र २०८० सालमा भएका शिक्षक आन्दोलनको बलमा नेपाल सरकारसँग क्रमश ३०, ५१ र ६ बुँदे सहमती गरेको र २०८१/०८२ मा चलेको ८९ दिने र काठमाण्डौ केन्द्रित २९ दिने आन्दोलन पछि भएको ९ बुँदे सहमतीलाई शिक्षा विधेयकमा समावेश नभएकोमा नेपाल शिक्षक महासंघले विरोध जनाएको छ । 

अस्थायी शिक्षकका लागि ७५ प्रतिशत आन्तरिक र २५ प्रतिशत खुला पदपूर्तिको व्यवस्था गर्न, गोल्डेन ह्याण्डसेक अन्तरगत दिइने रकमको किटान, स्थायी शिक्षकको आवधिक बढुवा र तहगत बढुवा, म्याद सकिएको अध्यापन अनुमतिपत्रको नवीकरण, विद्यालय कर्मचारीको तलब र पद, बाल कक्षा शिक्षकको सेवा, संस्थागत विद्यालयका शिक्षकको सुरक्षा, द्वन्द्व पीडित शिक्षकको उपदान र शिक्षक दरबन्दी पालिकामा हस्तान्तरण गर्न नहुने लगायतका माग सहमती अनुसार विधेयकमा नसमेटिएको नेपाल शिक्षक महासंघद्वारा जारी ध्यानाकर्षण पत्रमा उल्लेख गरिएको छ ।

धर्ना कार्यक्रमका प्रमुख अतिथि नेपाल शिक्षक संघ नवलपरासी(ब.सू.पूर्व) का अध्यक्ष इन्द्रराज भट्टराईले नेपाल शिक्षक महासंघ नै शिक्षकहरुको सझा संस्था रहेकाले महासंघको कार्यक्रममा सहभागी हुन सम्पूर्ण शिक्षकहरुलाई अनुरोध गर्नुभयो । साथै उहाँले नेपाल शिक्षक महासंघले नयाँ कुनै माग नगरेको केवल सरकार सँग विभिन्न समयमा भएका सहमतीहरुलाई सम्बोधन गरी शिक्षा विधेयक आउनुपर्ने बताउनुभयो । 

धर्ना कार्यक्रममा नेपाल शिक्षक संघ गण्डकी प्रदेश उपाध्यक्ष बिष्णुप्रसाद रिजाल, नेपाल राष्ट्रिय शिक्षक संगठन गण्डकी प्रदेश उपाध्यक्ष बलराम रानाभाट, नेपाल शिक्षक संघ गण्डकी प्रदेशका सदस्यद्वय शिवराज काफ्ले र गोविन्द रिमाल, नेपाल राष्ट्रिय शिक्षक संगठन जिल्ला उपाध्यक्ष पदमबहादुर खड्का, नेपाल राष्ट्रिय शिक्षक संगठन जिल्ला सदस्य नवराज काफ्ले, नेपाल शिक्षक संघ जिल्ला सदस्य बुद्धिनाथ पण्डित, नेपाल शिक्षक संघ गण्डकी प्रदेश प्रतिनिधी कल्पना काफ्ले, नेपाल शिक्षक संघ नगर उपाध्यक्ष राजु पुरी, नेपाल राष्ट्रिय शिक्षक संगठन नगर उपाध्यक्ष गोविन्द शर्मा, शिक्षक साविक उच्च मा.वि अनुदान कोटा शिक्षक प्रतिनिधी सुदन घिमिरे, विद्यालय कर्मचारी प्रतिनिधी ईश्वरी सापकोटा, बाल विकास सहजकर्ता प्रतिनिधी यशोदा शर्मा, नेपाल राष्ट्रिय शिक्षक संगठन नगर सचिव कृष्णप्रसाद खरेल, नेपाल शिक्षक संघ नगर समिति अर्थ सचिव अनिल कंडेल लगायत विभिन्न विद्यालयका प्रधानाध्यापक, सहायक प्रधानाध्यापक र शिक्षकहरुको उपस्थिति रहेको थियो ।

कार्यक्रम नेपाल शिक्षक महासंघ नवलपरासी(ब.सू.पूर्व)का उपाध्यक्ष हिमालदेव पंगेनीकाे अध्यक्षतामा सम्पन्न भएकाे  थियाे ।