गैँडाकोटमा यी विद्यालयले पाए कक्षा थप तथा विषय थपको अनुमति

नवलपरासी पूर्व । गैँडाकोट नगरपालिकाले नयाँ शैक्षिक सत्रदेखि मण्टेश्वरी स्थापना र केही विद्यालयहरुमा कक्षा थप तथा विषय थप गर्न अनुमति प्रदान गरेको छ । गैँडाकोट नगरपालिका विद्यालय सञ्चलन, व्यवस्थापन तथा नियमनका सम्बन्धमा बनेको कार्यविधि २०७५ अनुसार अनुमति प्रदान गरको हो । 
जनता माध्यमिक विद्यालय गैँडाकोट १२ लाई नयाँ शैक्षिक सत्रबाट कक्षा ११ मा होटल म्यानेजमेण्ट सञ्चालनको अनुमति प्रदान गरेको छ । यस्तै जनक मावि र रत्नराज्य लक्ष्मी माविमा कक्षा १२ मा होटल म्यानेजमेण्ट सञ्चालनको अनुमति दिएको छ । 
गैँडाकोट ईंग्लीस स्कूल गैँडाकोट २ ले कक्षा ११ मा विज्ञान विषय अध्यापनका लागि अनुमति पाएको छ । 
कक्षा १ देखि ९ सम्म सञ्चालन हुँदै आएको स्मल हार्ट एकेडेमीले र मौलाकालिका संस्कृत विद्यापीठ गँैडाकोट १ ले कक्षा १० को अनुमति पाएको छ । योगी नरहरिनाथ अध्यात्म विज्ञान गीता पाठशालाले कक्षा ९ र बाल उदय आधारभूत विद्यालय गैँडाकोट १५ ले कक्षा ५ को अनुमति प्राप्त गरेको छ । 
गैँडाकोट ५ मा फस्ट स्टेप मण्टेश्वरी सञ्चालनका लागि पालिकाले अनुमति दिएको छ । नगर शिक्षा समितिको फागुन १२ गतेको बैठकबाट भएको सिफारिसलाई फागुन १८ गते बसेको कार्यपालिकाको बैठकले अनुमति दिने निर्णय गरेको हो ।