नागरिकको उपचारका लागि घरघरमै पुग्छन् मुगुका स्वास्थ्यकर्मी बली 

हिमाली तथा पहाडी जिल्लाका कतिपय दुर्गम क्षेत्रमा अहिले पनि स्वास्थ्य संस्थाहरू पर्याप्त नहुँदा सामान्य बिरामी पर्दासमेत नागरिकलाई, जिल्ला सदरमुकाम वा नजिकको सहर बजारमा रहेका अस्पताल पुग्नुपर्ने बाध्यता भइरहेको छ । तर मुगुको मुगुम कार्मारोङ गाउँपालिकाको स्वास्थ्य शाखामा कार्यरत एक स्वास्थ्यकर्मीले विदाको दिनमासमेत घरघरमा पुगेर नागरिकलाई स्वास्थ्य सेवा दिइरहेका छन् ।

सर्वसाधारणको घरमै पुगेर स्वास्थ्यकर्मी बलिबहादुर बुढाले सेवा दिइरहनु भएको हो । जिल्लाको पूर्वतिर पर्ने मुगुम कार्मारोङ गाउँपालिकामा करिब नब्बे प्रतिशत लामा समुदायको बसोबास छ । उनीहरू घरघरमै आईपुग्ने स्वास्थ्यकर्मी बुढा प्रति कृतज्ञ छन् । पापुँ गाउँबाट सुरु भएको शनिवारे सेवा अभियानकै रुपमा दोल्फु, चितै, मुगु, कार्ति, किर्मी, ताखा, खारी, दाउरा, सेरोग, पुवा, रिउस, मह, माँग्री लगायत १६ वटा गाउँमा पुगिसकेको छ ।

स्वास्थ्यकर्मी बुढाले एउटा विद्यालय र गुम्बामासमेत पुगेर स्वास्थ्य सेवा दिनुभयो । घरमै आएर स्वास्थ्यकर्मीले सेवा दिएपछि विपन्न नागरिकलाई पनि केही राहत मिलेको, पुवाका ग्याल्ज लामाले बताउनुभयो । स्वास्थ्यकर्मी बुढा, मुगुम कार्मारोङ गाउँपालिकाको स्वास्थ्य शाखामा कार्यरत हुनुहुन्छ ।

छुट्टीको दिन अर्थात् शनिवारे सेवामा उहाँले दीर्घ रोग, स्वास्थ्य सरसफाइका साथै चोटपटक, दुर्घटना, खोप, मातृशिशु स्वास्थ्यलगायतका विषयमा आम नागरिकलाई जानकारीसमेत दिने गर्नु भएको छ ।