गैँडाकोटमा भएको दुर्घटनामा एक वृद्धाको मृत्यु

गैँडाकोट । गैँडाकोटमा भएको दुर्घटनामा एक वृद्धाको मृत्यु भएको छ ।

गैँडाकोट ५ स्थित कालिका चोक नजिक भित्रि सडक खण्डमा म्याजिकको ठक्करबाट एक वृद्धाको मृत्यु भएको हो । 

ना १ ज ३५५१ नम्बरको म्याजिकको ठक्करबाट गैँडाकोट ५ बस्ने ७४ वर्षिया लिलादेवी उपाध्याय पौडेलको मृत्यु भएको इलाका प्रहरी कार्यालय गैँडाकोटका प्रहरी निरीक्षक कमला नरालले जानकारी दिनुभयो ।

शनिबार साँझ करिब सवा ६ बजेको समयमा म्याजिकले ठक्कर दिएको थियो । उनलाई उपचारका लागि भरतपुर अस्पताल लगिएकोमा चिकित्सकले मृत घोषणा गरेका थिए । 

ठक्कर दिने म्याजिक र चालक गैँडाकोट ७ का २२ वर्षिया करण कुमाल नियन्त्रणमा रहेको उहाँले जानकारी दिनुभयो ।

रिङ्गरोडमा चल्ने म्याजिक साँझ काँग्रेस चोकबाट भित्रि सडक हुँदै गैँडाकोट ७ गैरी जाने क्रममा सो दुर्घटना भएको प्रहरी भनाई छ ।