नवलपुरका गायक राजन गुरुङको नयाँ गित ‘साँझको बेला’ सार्वजनिक

नेपाली लोक तथा दोहोरी गीतको क्षेत्रमा पहिलो पटक युट्युवमा करोड भ्युज पुगेको गीत ‘उही खोलीमा पानी’का गायक राजन गुरुङको नयाँ गीत सार्वजनिक गरिएको छ । थोरै गीत गाउने तर मौलिक गीत ल्याउने गरेका राजनको ‘साँझको बेला’ बोलको गीत सार्वजनिक गरिएको हो । यस गीतको लय भने पुरानै हो । वरिष्ठ सर्जक स्व. तिर्थ गन्धर्वको कम्पोज रहेको यो गीत एकसमयको निकै लोकप्रिय पनि हो । स्व. गन्धर्वका छोरा कुमार गन्धर्वसँगको सहकार्यमा त्यसै लयमा बसन्त थापाले नयाँ शैली लिएर कम्पोज गरेका छन् । गीतमा प्रलाद सुवेदीको शब्द रहेको छ । गीतमा राजनसँगै सुनिता बुढा क्षेत्रीको स्वर रहेको छ । 
गीतको भिडिओ मौसम हिमालीले निर्देशन गरेका हुन् भने पुष्प खड्का, कविता नेपाली, राजन गुरुङ र अमृता देवी गुरुङको अभिनय रहेको छ । नवराज उप्रेतीले खिचेको भिडिओ मनोज कार्कीले सम्पादन गरेका हुन् । गीतको बिषयमा गायक राजनले आफूले सधैं नेपाली गीतसंगीतको क्षेत्रमा मौलिकता नछाड्ने बताउँछन् । नेपाली लोकगीत भन्ने बित्तिकै मौलिकता झल्किनुपर्ने उनको धारणा छ । पछिल्लो समयका कतिपय लोकगीतमा मौलिकता हराएको उनी बताउँछन् । मैले आजभन्दा सात बर्ष अघि सार्वजनिक गरेको उही खोलीको पानीलाई दर्शकले जुन किसिमको माया दिनुभएको थियो, त्यो बेलादेखी नै मौलिकता भरिएका गीत ल्याइरहेको छु । दर्शक तथा स्रोताले साथ दिनुभएको छ खुसी लाग्छ । गायक गुरुङले  भने । अहिलेको यस गीतलाई सार्वजनिक भएको केहिदिन भयो उत्तिकै माया दिइरहनुभएको छ ।

गीतको भिडिओ नेपालकै पहिलो होमस्टे तथा सुन्दर पर्यटकीय गाउँ स्याङ्जाको सिरूबारीमा छायाङ्कन गरिएको हो । गीतमा सिरूबारी गाउँका प्राकृतिक तथा मानव निर्मित संरचनाहरूका दृश्यावलीहरू कैद गरिएकाले गीत अझै सुन्दर बन्न पुगेको छ ।राजन गुरुङ नवलपुरको कावासोती निवासी गायक हुन् ।