गैंडाकोट नगरपालिकामा लैङ्गिक हिंसा विरुद्धको १६ दिने अभियान सुरु

गैंडाकोट । गैंडाकोट  नगरपालिकाले मंगलबार आजदेखि लैङ्गिक हिंसा विरुद्धको १६ दिने अभियान सुरु गरेको छ । ‘प्रविधिको सही प्रयोग गरौँः लैङ्गिक हिंसा अन्त्य गरौँ’ भन्ने मूल नाराका साथ लैङ्गिक हिंसा विरुद्धको १६ दिने अभियान सुरु भएको हो । गैंडाकोट नगरपालिकाको आयोजना तथा आफन्त नेपालको सहकार्यमा एक कार्यक्रमकाबीच अन्तरक्रिया तथा प्रतिबद्धता पत्रमा हस्ताक्षर गरेर कार्यक्रमको शुभारम्भ गरिएको थियो ।

सार्वजनिक वा निजी जिवनमा लिङ्गको आधारमा कसै प्रति शारिरीक मानसिक वा यौनजन्य क्षति वा पीडा पुर्याउने कार्यलाई लैङ्गिक हिंसा हो । हिंसा विरुद्ध सबैले आवाज उठाउने सहभागिहरुले प्रतिबद्धता जनाएका थिए ।

कार्यक्रममा गैंडाकोट नगरपालिका उपप्रमुख शान्ति कोइरालाले विद्यालय स्तरीय तथा समुदायस्तरीय, पालिकास्तरीय विभिन्न कार्यक्रमहरू यस अभियानमा गरिने भन्दै उहाँले हिंसा न्यूनीकरणमा सबै मिलेर हातेमालो गर्दै अघि बढ्न आग्रह गर्नुभयो । हिंसा अन्त्य गर्न आफु सचेत बन्नुपर्ने र आर्थिक, मानसिक रुपमा पनि सबल बन्ने गरि काम गर्नुपर्नेमा उपप्रमुख कोइरालाले जोड दिनुभयो । 

त्यस्तै,  नगर प्रमुख मदनभक्त अधिकारीले अहिलेको समयमा समुदाय शिक्षित हुँदै गएको अवस्थामा समेत हिंसाका घटनाहरू बढ्नु , शिक्षित वर्गबाट नै हिंसा हुनु अनुसन्धानको विषय बनेको भन्दै उहाँले सरोकारवाला सबै मिलेर यस विषयमा गम्भीर भएर लाग्नुपर्ने बताउनुभयोे । प्रमुख प्रशासकीय अधिकृत रामचन्द्र लामगादे लगायत अन्य कर्मचारीहरुको उपस्थिती  रहेको कार्यक्रमको  स्वगत मन्तव्य तथा सहजीकरण महिला तथा बालबालिका शाखा प्रमुख राधा पौडेलले गर्नुभएको थियो । 

त्यस्तै, चितवनमा पनि लैङ्गिक हिंसा विरुद्धको १६ दिने अभियान आजदेखी सुरु भएको छ ।  जिल्ला समन्वय समिति चितवनका प्रमुख नारायणप्रसाद अधिकारी, चितवनका प्रमुख जिल्ला अधिकारी गणेश अर्याल, चितवनका स्थानीय तहका उपप्रमुख एवम् अधिकारकर्मीहरुको उपस्थितिमा अभियानको सुरुवात गरिएको हो । जिल्लास्तरीय लैङ्गिक हिंसा नियन्त्रण सञ्जाल चितवनले अभियानअन्तर्गत १६ दिनसम्म विभिन्न खालका कार्यक्रम गर्न सकिने तालिकासमेत सार्वजनिक गरेको छ । कार्यक्रममा नेपाल प्रहरीसम्म आइपुगेको हिंसाजन्य जानकारी र तथ्यांक समेत प्रस्तुत गरिएको थियो ।