नवलपुरमा ब्याजदर निर्धारण तथा पूँजीको अनुपात विश्लेषण विषयक दुई दिने तालिम सम्पन्र

नवलपुर । जिल्ला सहकारी संघ लिमिटेड, नवलपुरको आयोजनामा ब्याजदर निर्धारण तथा पूँजीको अनुपात विश्लेषण सम्बन्धी दुई दिने तालिम देवचुली-१५, प्रगतिनगरमा समापन भएको छ । तालिम नेपाल साकोस नवप्रगति सेवा केन्द्रको सभाहलमा भएको थियो ।

कार्यक्रमका प्रमुख अतिथी जिल्ला बचत तथा ऋण सहकारी संघका अध्यक्ष बद्रीनाथ नेपालले बचत तथा ऋण कारोबार गर्ने सहकारी संस्थाहरुले ब्याजदर निर्धारण एबम् कोष अगाडि बढाएर संस्थाको समग्र विकासमा टेवा दिनुपर्ने कुरामा जोड दिनुभयो ।

कार्यक्रमको अध्यक्षता जिल्ला सहकारी संघका उपाध्यक्ष तुलमणि पौडेलले गर्नुभएको थियो । तालिममा जिल्लाका विभिन्न सहकारी संस्थाबाट ४५ जना प्रतिनिधिहरूको सहभागिता रहेको थियो ।

जिल्ला सहकारी संघका लेखा सुपरिवेक्षण समिती संयोजक छविलाल अर्याल, शिक्षा उपसमिती सदस्य सरस्वती पंथी लगायतको उपस्थिती रहेको कार्यक्रमको सहजीकरण संघका सचिव श्यामसुन्दर लामिछानेले गर्नुभएको थियो भने तालिममा सहकारी विज्ञ केशवप्रसाद पोखरेलले प्रशिक्षकका रूपमा सहकारीको ब्याजदरको वैज्ञानिक निर्धारण, जोखिम व्यवस्थापन, पूँजीको न्यूनतम अनुपात, नियमन तथा निरीक्षण, र सदस्यको बचत-सुरक्षा जस्ता विषयमा मार्गदर्शन प्रदान गर्नुभएको थियो ।

सहकारीको वित्तीय स्वास्थ्य, सदस्यको बचतको सुरक्षा तथा दीगो सहकारी सञ्चालनका लागि ब्याजदर र पूँजीको सही अनुपातको ज्ञान अत्यन्त महत्वपूर्ण हुने भएकाले तालिमले जिल्लाभरिका सहकारीहरूलाई व्यावहारिक रुपमा सुदृढ बनाउन मद्दत गर्ने अपेक्षा गरिएको आयोजकले जनाएको छ।