नवलपुरमा ‘ब्याजदर निर्धारण तथा पूँजीको अनुपात विश्लेषण’ विषयक दुई दिने तालिम सुरु

नवलपुर । जिल्ला सहकारी सङ्घ लिमिटेडका आयोजनामा ब्याजदर निर्धारण तथा पूँजीको अनुपात विश्लेषण सम्बन्धी दुई दिने तालिम आजदेखि देवचुली-१५, प्रगतिनगरमा सञ्चालन भइरहेको छ। तालिम नेपाल साकोस नवप्रगति सेवा केन्द्रको सभाहलमा सुरु भएको हो ।

उद्घाटन सत्रमा बोल्दै राष्ट्रिय सहकारी महासङ्घ लिमिटेडका सञ्चालक होमनाथ जैसीले सहकारी संस्थाहरूलाई सुशासनको मार्गमा हिड्नुपर्ने र पारदर्शी ढंगले सञ्चालन गर्नुपर्नेमा जोड दिनुभयो । उहाँले सहकारीमा लागु हुने ब्याजदर, लगानी तथा अन्य कोष व्यवस्थापनमा सञ्चालक, व्यवस्थापकदेखि सेयर सदस्यसम्म सबैलाई आवश्यक वित्तीय ज्ञान हुनुपर्ने उल्लेख गर्नुभयो ।  

कार्यक्रमको अध्यक्षता जिल्ला सहकारी सङ्घका उपाध्यक्ष तुलमणि पौडेलले गर्नुभयो । उद्घाटन कार्यक्रममा उपाध्यक्ष खिनाकुमारी भुसाल, सहसचिव बिन्दु अधिकारी, सञ्चालक मनहरी पौडेल, लेखा सुपरिवेक्षण समितिका संयोजक छविलाल अर्याल, जिल्ला बचत तथा ऋण सहकारी संस्था लिमिटेडका सहसचिव नारायणप्रसाद पौडेललगायतको सक्रिय उपस्थिति रहेको थियो ।

तालिममा जिल्लाका विभिन्न सहकारी संस्थाबाट ४५ जना प्रतिनिधिहरूको सहभागिता रहेको छ। कार्यक्रमको सहजीकरण सङ्घका सचिव श्यामसुन्दर लामिछानेले गर्नुभएको छ भने तालिममा सहकारी विज्ञ केशवप्रसाद पोखरेलले प्रशिक्षकका रूपमा सहकारीको ब्याजदरको वैज्ञानिक निर्धारण, जोखिम व्यवस्थापन, पूँजीको न्यूनतम अनुपात, नियमन तथा निरीक्षण, र सदस्यको बचत-सुरक्षा जस्ता विषयमा मार्गदर्शन प्रदान गर्दै हुनुहुन्छ।

सहकारीको वित्तीय स्वास्थ्य, सदस्यको बचतको सुरक्षा तथा दीगो सहकारी सञ्चालनका लागि ब्याजदर र पूँजीको सही अनुपातको ज्ञान अत्यन्त महत्वपूर्ण हुने भएकाले तालिमले जिल्लाभरिका सहकारीहरूलाई व्यवहारिक रुपमा सुदृढ बनाउन मद्दत गर्ने अपेक्षा गरिएको आयोजकले जनाएको छ।