हमासद्वारा सन् २०१४ मा मारिएका इजरायली सैनिकको शव हस्तान्तरण

गाजा । हमाससँगको युद्धविराम सम्झौताको पहिलो चरणअन्तर्गत सन् २०१४ मा हमासको एम्बुसमा मारिएका लेफ्टिनेन्ट हादार गोल्डिनको शव इजरायलले प्राप्त गरेको छ। उनको शव विगत ११ वर्षदेखि गाजामा राखिएको थियो।

इजरायली सेना (आईडीएफ) ले २३ वर्षको उमेरमा मारिएका गोल्डिनको औपचारिक पहिचान गरी अब उनको अन्त्येष्टि गरिने जानकारी दिएको छ। हमासको सशस्त्र समूहले युद्धविराम सम्झौताको एक हिस्साको रूपमा आइतबार गोल्डिनको शव हस्तान्तरण गर्ने बताएको थियो।

यस सम्झौताको पहिलो चरणमा हमासले सबै २० जना जीवित बन्धकहरू र २८ जना मृतक बन्धकहरूमध्ये २४ जनाको शव फिर्ता गरेको छ। इजरायली प्रधानमन्त्री बेन्जामिन नेतान्याहु र राष्ट्रपति आइजेक हर्जोग दुवैले ११ वर्षदेखि आफ्नो कार्यालयमा गोल्डिनको तस्बिर राखेको बताएका छन्।

नेतान्याहुले भने, ‘हामीले उनलाई घर ल्याउने प्रयासमा हार मानेनौं, आज हामी उनलाई अन्ततः उनका आमाबाबु र परिवारकहाँ इजरायल ल्याउन सफल भएका छौं।’

आईडीएफले गोल्डिनको शव फिर्ता ल्याउनको लागि पछिल्लो एक दशकदेखि र विशेष गरी विगत दुई वर्षको युद्धमा व्यापक गुप्तचर र परिचालन प्रयासहरू गरिएको बताएको छ। गाजामा रहेका बाँकी चार बन्धकमध्ये तीन इजरायली र एक थाई नागरिक छन् । एजेन्सी