जनक र कालिका माविका विद्यार्थीहरुले गरे गैँडाकोट पम्पिङ्ग खानेपानी संस्थाको अवलोकन

गैँडाकोट पम्पिङ्ग खानेपानी तथा सरसफाई उपभोक्ता संस्थाको गैँडाकोटका जनक नमुना मावि र कालिका माविका विद्यार्थीहरुले मंगलबार अवलोकन भ्रमण गरेका छन । उनिहरुले खानेपानी संस्थाले कसरी पानी वितरण र शुद्धता कायम राखेको छ भन्ने जानकारी पाएका छन् ।

खानेपानी संस्थाका अध्यक्ष कुष्णप्रसाद न्यौपाने, खानेपानी सुरक्षा उप समितिका संयोजक कृष्णप्रसाद काफ्ले, खानेपानी सुरक्षा उप समितिका सदस्य डिल्लीराज न्यौपाने, व्यवस्थापक अशोक तिवारीले खानेपानीले पानी शुद्धिकरण गर्ने विधि र संस्थाका बारेमा प्रत्यक्ष अवलोकन गराउँदै जानकारी दिनुभएको थियो । 
यस्तै कार्यक्रममा बोल्दै खानेपानी संस्थाका अध्यक्ष कृष्णप्रसाद न्यौपानले खानेपानी संस्थाले स्वच्छ र स्वस्थ खानेपानी वितरण गर्दै आइरहेको बताउँदै उपभोक्ताको सहजता र सरलताका लागि काम गर्दै जाने बताउनुभयो । उहाँले सामुदायिक विद्यालयलाई पानीको विल बापतको २५ प्रतिशत रिफण्ड गर्ने पनि बताउनुभयो । 

खानेपानी सुरक्षा उप समितिका संयोजक कृष्णप्रसाद काफ्लेले पानी अत्यावश्यक भएको र पानी स्वास्थ्य नै जिवन स्वास्थ्य हो भनि त्यसै अनुसारका कामलाई अगाडी बढाइरहेको बताउनुभयो । उहाँले पानी सुरक्षाका बारेमा विद्यार्थी, गृहणी र समुदायका अन्य व्यक्तिहरुलाई पनि सचेतना दिइरहेको बताउनुभयो । 

खानेपानी संस्थाका सचिव केशव पौडेलले थप नयाँ विधि र प्रबिधि अनुसार अगाडी बढ्ने बताउनुभयो । उहाँले विद्यार्थी नै समाजका एक अभिन्न हिंसा भएकाले र उनिहरुलाई व्यवहारिक अध्ययनमा पनि सहयोग पुग्ने हिसावले सचेतनात्मक र अवलोकनात्मक कार्यक्रम गरिएको बताउनुभयो । 

खानेपानी सुरक्षा उप समितिका सदस्य डिल्लीराज न्यौपानेले पानीमा चुनको मात्रा खान योग्य भएकोले निर्धक्क भएर पानी पिउन सकिने बताउनुभयो । 
विद्यार्थीहरुले राखेको जिज्ञासाको संस्थाका अध्यक्ष, सचिव एवं खानेपानी सुरक्षा समितिका पदाधिकारीले जवाफ दिनुभएको थियो । कार्यक्रममा जनक र कालिका विद्यालयका विद्यार्थी शिक्षक र खानेपानी संस्थाका पदाधिकारी, विभिन्न समिति र उप समितिका सदस्यहरुको उपस्थिती रहेको थियो ।