रास्वपाले चितवनबाट जनताको कुरा सुन्ने यात्रा, जनयात्रा सुरु गर्दै

चितवन । राष्ट्रिय स्वतन्त्र पार्टी (रास्वपा)ले चितवनबाट जनताको कुरा सुन्ने यात्रा, जनयात्राको सुरुवात गर्ने भएको छ । रास्वपा सभापति रवि लामिछानेका अनुसार चैत २३ गते शनिबारदेखि जनयात्रा सुरु हुँदै छ ।

सोमबार बसेको रास्वपाको केन्द्रिय समितिको बैठकमा सभापति लामिछानेले यसबारेमा जानकारी दिनुभयो । जनयात्रा सुरु गर्न लामिछाने शनिवार चितवन आउनु हुनेछ  ।

चितवन क्षेत्र नं २ बाट निर्वाचित भई हाल सहकारी ठगी मुद्धाका कारण निलम्बित हुनुभएका लामिछानेले आफु गृहमन्त्री हुँदा प्रचण्ड नेतृत्वको सरकारलाई किन ढलाइयो भन्नेबारे आफ्ना मतदातालाई जानकारी गराउने बताउनुभयो । त्यस्तै, ओली नेतृत्वको गठबन्धन सरकारले अर्को प्रहार गर्नसक्ने भएकाले अहिलेको पार्टी संरचना अझै सबल र सशक्त हुन आवश्यक रहेको उहाँको भनाइ छ । लामिछानेले गणतन्त्र भनेको ओली तन्त्र र देउवा तन्त्र नभई जनताको तन्त्र भएको बताउनुभएको छ  । 

गणतन्त्रमा पनि सुधार आवश्यक रहेको बताउँदै सबै व्यवस्थाको उत्कृष्टताको परीक्षा दिनुपर्ने र त्यसमा केही पास भएको तथा केही फेल भएको लामिछानेले उल्लेख गर्नुभयो ।