नयाँ वर्षको अवसरमा नारायणी किनारमा ‘मिसन रेड न्यू इयर फेस्ट हुँदै, ५ ब्याण्डले प्रस्तुती दिने

चितवन ।  नयाँ वर्षको अवसरमा चितवनमा रक्तदान अभियान संचालन गरिरहेका युवाहरुले रक्तदानको चेतना फैलाउने उद्देश्यले ‘मिसन रेड न्यू फेस्ट-२०८२’ को आयोजना गर्ने भएका छन् । नयाँ वर्षलाई स्वागत गर्दै एसडी इभेन्ट्स म्यानेजमेन्ट कम्पनीको व्यवस्थापनमा यहीँ चैत ३१ गते साँझ नारायणी नदी किनारमा सांगीतिक कार्यक्रम गर्न लागेको हो । 

कार्यक्रमलाई वृहत बनाउन ५ वटा चर्चित सांगीतिक ब्याण्डहरु आउँदैछन् । ‘म्युजिक फर ब्लड’ नारा दिइएको कार्यक्रममा चर्चित ब्याण्डहरु ‘द एक्स ब्याण्ड’, ‘कुटुम्ब’, ‘मन्त्र’, ‘समीर श्रेष्ठ एण्ड द गुड ब्वाइज’ र ‘केहर एण्ड जोय’ले प्रस्तुती दिने इभेन्टका निर्देशक सौगात देवकोटाले जानकारी दिनुभयो । ‘युवा पुस्तालाई रक्तदानमा प्रेरित गर्नका लागी पनि उनीहरुले मन पराउने संगीतलाई नै रोजेको देवकोटाको भनाई छ । 

यसअघि युवाहरुले प्रेम दिवशको दिन ‘प्रेमिल साँझ’ सांगीतिक कार्यक्रम गरेका थिए । युवाहरुले ब्लड डोनर्स सोसाइटीमार्फत चितवनमा रक्तदान अभियानलाई अघि बढाइरहेका छन् । केन्द्रीय कार्यालय चितवन रहेको यो सोसाइटीको अहिले विभिन्न जिल्लाहरुमा शाखा गठनको प्रक्रियामा छ । सोसाइटीका केन्द्रीय अध्यक्ष अर्जुन अधिकारीले पछिल्लो समय रगतको अभाव बढ्दो क्रममा रहेकाले संगीतमार्फत सचेतना फैलाउन थालिएको बताउनुभयो । अधिकारीले ‘मिसन रेड’ अभियान चलाएर रक्तदान कार्यलाई प्रभावकारी बनाउन युवाहरुलाई जोड्ने काम भइरहेको बताउनुभयो ।