फेरि एक जनामा कोरोना पोजेटिभ, संक्रमितको संख्या ६ पुग्यो

0

२० चैत्र । नेपालमा फेरि एक जनामा विश्वभर महामारीको रुप लिएको कोरोना भाइरस कोभिड १९ देखिएको छ । स्वास्थ्य तथा जनसंख्या मन्त्रालयका प्रवक्ता डा. विकास देवकोटाका अनुसार राष्ट्रिय जनस्वास्थ्य प्रयोगशालामा आज गरिएको परीक्षणमा कोरोना भाइरस पोजेटिभ देखिएको हो । गत चैत्र ४ गते दोहाबाट काठमाण्डौ आएको क्युआर ६५२ विमानमा सवार अर्का यात्रुमा पोजेटिभ देखिएको हो । यो सँगै नेपालमा संक्रमितको सख्या ६ पुगेको छ भने एक जना उपचार पछि घर फर्किएका छन् ।

देवकोटाका अनुसार क्यूआर ६५२ को फ्लाइटमा दोहाबाट काठमाडौं आएकी उहाँ युवती रहेको र बागलुङकै रहेको उहाँले बताउनुभयो । यसअघि यही विमानमा आएका दुईजनामा कोरोना पुष्टि भएको थियो।  नेपालमा अहिलेसम्म ११ सय ८४ जनाको कोरोना परीक्षण भएको छ। मन्त्रालयका अनुसार काठमाडौं उपत्यकामा १६ सहित एक सय पाँचजना आइसोलेसनमा छन्। बिहीबार मात्र ३९ जनाको कोरोना परीक्षण भएको हो।

सरकारले बुधबारसम्म १ हजार १ सय ४५ जनाको मात्रै कोरोना परीक्षण गरेको थियो। जसमा ५ जनामा कोरोना पुष्टि भएको थियो। उपत्यका बाहिर धरानको बीपी कोइराला स्वास्थ्य विज्ञान प्रतिष्ठानमा १२ वटा नमुना परीक्षण भएको छ।  पहिलो पटक चीनबाट नेपाल आएका पुरुषमा माघ ९ गते कोरोना पुष्टि भएको थियो। ति युवक उपचारपछि निको भइसकेका छन्। त्यसको दुई महिनापछि फ्रान्सबाट कतार हुँदै चैत ४ गते नेपाल आएकी १९ वर्षकी युवतीमा चैत १० गते कोरोना पुष्टि भएको थियो। दुईजनामा कोरोना पुष्टि भएपछि सरकारले चैत ११ गते लकडाउनको घोषणा गरेको हो।

चैत १५ गते भएको स्वास्थ्य परीक्षणमा बेल्जियमबाट कतार हुँदै क्यूआर ६५२ नम्बरको उडानमा १७ मार्च ९चैत ४ गते० नेपाल आएकी बाग्लुङकी युवतीमा कोरोना पुष्टि भएको थियो । संक्रमित मध्ये दुईको शुक्रराज ट्रपिकल तथा सरुवा रोग अस्पताल टेकुमा उपचार भइराखेको छ । एकजनाको प्रादेशिक अस्पताल धनगढी र अन्य दुईजनाको बागलुङमै उपचार भइराखेको छ ।

Share.

Leave A Reply