फागुन २६ सम्मका लागि संसद बैठक स्थगित

0

गैँडाकोट,फागुन २३ । संसद पुनस्थापनापछि बसेको पहिलो प्रतिनिधि सभा बैठक फागुन २६ गते दिउसो १ बजेसम्मका लागि स्थगित भएको छ । आज सुरु बैठकमा प्रमुख प्रतिपक्ष नेपाली कांग्रेस र जनता समाजवादी पार्टीले अवरोध गरेपछि संसद सचिवालयले सूचना टाँस गरेर बैठकको नयाँ मिति फागुन २६ गते दिउँसो १ बजेका लागि तोकिएको हो ।

प्रतिपक्ष दलका सांसदहरुको नाराबाजीका बीच सभामुख अग्नी प्रसाद सापकोटाले बैठक १० मिनेटका लागि स्थगित गर्नुभयो । त्यसपछि सूचना टाँस गरेर फागुन २६ गतेसम्मका लागि बैठक स्थगित भएको हो ।

आइतबारको संसद बैठक नेकपाको प्रचण्ड माधव समूहले बहिस्कार गरेको थियो भने कांग्रेस र जसपाले संसद नभएका बेला सरकारले ल्याएका अध्यादेश पेश गर्ने विषयमा असहमति जनाउँदै नाराबाजी गर्दै अवरुद्ध गरेको हो ।

संसद सचिवालयले आइतबारको बैठकको कार्यसूचीमा वर्तमान र पूर्व सांसदहरुको निधनमा शोक प्रस्ताव गर्ने विषय समेत उल्लेख गरेको थियो ।

प्रचण्ड माधव समूहका सांसद भीम रावलले शोक प्रस्ताव पारित हुने दिन अन्य विषय कार्यसूचीमा राख्न नहुने बताएका थिए । तर सभामुख अग्निप्रसाद सापकोटाले अध्यादेशहरु संसद बैठक बसेकै दिन पेश गर्नुपर्ने कानुनी प्रावधान रहेको भनी बचाउ गरेपछि प्रचण्ड माधव समूहका सांसदले प्रतिनिधिसभा बैठकस्थल छाडेका थिए ।

त्यसपछि नेपाली कांग्रेसका सांसदहरुले पनि उठेर विरोध जनाए । कांग्रेस संसदीय दलका प्रमुख सचेतक बालकृष्ण खाँड र सचेतक पुष्पा भुसालले सरकारले संवैधानिक परिषदसम्बन्धी अध्यादेश ल्याएर संवैधानिक परिषदको मर्ममाथि प्रहार गरेको भन्दै उक्त अध्यादेश पेश गर्न नदिने अडान लिए ।

तर पनि सभामुख सापकोटाले विरोधका बाबजुद कानुन न्याय तथा संसदीय मामिलामन्त्री लीलानाथ श्रेष्ठलाई संवैधानिक अध्यादेशसम्बन्धी विधेयक पेश गर्न अनुमति दिएपछि कांग्रेस र जनता समाजवादी पार्टीका सांसदले रोस्टममा नाराबाजी गरेका थिए । नाराबाजी नरोकिएपछि सभामुख सापकोटाले बैठक १० मिनेटका लागि स्थगित गर्नुभएको थियो ।

Share.

Leave A Reply