मानव अधिकारको अवस्थाबारे नवलपुरमा आजबाट अनुगमन गरिने

0

१७ बैशाख । गैर सरकारी संस्था महासंघ नवलपरासी (बर्दघाट सुस्ता पूर्व) का अध्यक्ष बद्रीनाथ नेपालको संयोजकत्वमा गठन भएको जिल्ला स्तरीय मानव अधिकार अवस्था अनुगमन समिति नवलपरासी (बर्दघाट सुस्ता पूर्व) ले आजबाट अनुगमन गर्ने भएको छ ।

राष्ट्रिय मानव अधिकार आयोगको परिपत्र बमोजिम नेपाल पत्रकार महासंघ र नेपाल बार एसोशियसन जिल्ला शाखा सदस्य रहनेगरि मानव अधिकार अवस्था अनुगमन समिति गठन गरिएको थियो । समितिको सदस्यमा नेपाल पत्रकार महासंघ नवलपुरका अध्यक्ष होमराज रानाभाट र नेपाल बार एसोशियसन नवलपुरका उपाध्यक्ष अधिवक्ता गणेश अधिकारी सदस्य रहनु भएको छ । समितिको मंगलबार नै बसेको बैठकले जिल्लामा मानव अधिकार रक्षा निम्ती क्रियाशिल संस्थाको तर्फबाट इन्सेक जिल्ला प्रतिनिधि तिर्थराज डुम्रेलाई अनुगमन समितिको सदस्यमा थप गरेको छ भने आवश्यकता अनुसार थप सदस्यलाई समेत समावेश गरिने संयोजक नेपालले बताउनु भयो ।

गठित समितिले वर्तमान जटिल परिस्थितिमा कोभिड–१९ विरुद्ध लड्न सरकारबाट भइरहेका कार्यहरु, स्वास्थ्योपचारको व्यवस्था, आम उपभोक्ताहरुको अधिकार, अभिव्यक्ति स्वतन्त्रता, न्याय प्रशासनमा पहुँच, नागरिकको कर्तव्य लगायत कोभिड–१९ बाट प्रभावित अन्य मानव अधिकारहरुको अवस्थाको अनुगमन गरि स्थानीय स्तरमा देखिएका समस्या समाधानमा सहजीकरण गर्ने तथा राष्ट्रिय मानव अधिकार आयोगका कार्यालयहरुमा तथ्य तथा सुचनाहरु संप्रेषण गर्नेछ ।

समिति गठन सम्बन्धमा मंगलबार नै समितिका सदस्यहरुले प्रमुख जिल्ला अधिकारी पिताम्बर घिमिरेलाई जानकारी गराउदै आवश्यक समन्वय तथा सहयोगको लागि अनुरोध समेत गरेका छन् ।

समितिले बुधबार देखि जिल्लाको विभिन्न स्थानमा अनुगमन गर्ने नेपाल पत्रकार महासंघ नवलपुरका अध्यक्ष होमराज रानाभाटले बताउनु भयो ।

Share.

Leave A Reply